رجع من الشباك يا جَمَاعَه

وبالغبا ينهش على الضِّبَاعَه

هدد كأنُّه طاهش البوادي

بيأكل الخرفان كالزبادي

وبينسف المشرق على العبادِ

ويجعل الستين في المزادِ

عنده دليل أن الشباب تبلطج

يا ويلكم كيف الخبر تلجلج

هذا علي صالح فقي زمانُه

بيعرف المستور في مكانُه

دلا دلا يا كبش في قرونَك

وبطل الهِدَّاش في طحينك

من علَّمك للقصف يا مُدَعَّس

خَزِّيت بنفسك كل يوم تِلَحوَس

مثل الحنش على الدجاج تِمَطمَط

يا سارق البيضات ِيا مُمَلطَط

اهجع وِوَلِّي واترك الشتائم

قدك خَرِف مثل العجور هارِم

والا قسم بالله يا مُهَشهَش

قد الشباب ضابح عليك واطفَش

نسيت رعد الشعب يا صَمَامَه

نسيت ظلمك يا علي قُمَامَه

نسيت أن الدم في تهامه

سقى الربوع لِمَه لِمَه عَلَامَه

قاتل.. زعيم الجُرمِ والمطابخ

والَّا أمير الغدر والمشانِخ

لا تَركِنِيش ظَهرِك على الحصانه

دَمَّ الشهيد على الرقاب أمَانَه

وبكره يجيك الدور في الحدودِ

بتشوف صوت الشعب كالرُّعُودِ

قسم بربي ما لقيت أَهبَل

مثلك علي كذاب دون يِخجَل

الشعب صحوه للنجوم صاعِد

ومثلك عليل المال والمقاعِد

حب الوطن جِيبَك وفي الخِزَانَه

والحُكم شهوه والفساد رَزَانَه

علي علي يا فارس الحزاوي

يكفي شَلَخ خليك في الزواوي

الشعب طلق بالثلاث وودَّع

وِكل فاسد يرعشه وِيصفَع

اخرس مع الشيطان يا مُجَعجَع

ويا شباب الخير في حقولُه

امضي حماك الله في سبيلُه

صوت الوطن في القلب فاسمعولُه

أنتم نجومُه قوموا هَلِّلُوا لُه

اذا عطش بالدَّم عَمِّدوا لُه